Hər keçən gün biomüxtəliflilik krizi davam edir və biz növlərimizi itiririk. Dünən dərc olunmuş reporta görə isə ölkəmizdə qeydə alınmış 410-a yaxın quş növündən biri olan Kiçik əyridimdik cüllütün (lat. Numenius tenuirostris) dünyada nəsli kəsilmiş hesab olunur! Qeyd edim ki, o ölkəmizdə rast gəlinən ən nadir 3 quş növündən biri idi və digər ikisindən ağ durnanın da ölkəmizdəki populyasiyasının nəsli tükənmiş kimi görünür (son iki ildir tənha erkək Ümid qeydə alınmır!)
Kiçik əyridimdik cüllüt (lat. Numenius tenuirostris) – Ölkəmizdə qeydə alınmış üç əyridimdik cüllüt növündən ölçücə ən kiçiyidir. Rusiyanın cənubu və Qazaxıstanın bozqırlarında (izotop analizlərinə əsasən) yuvalayan bu növ qışlamaq üçün cənuba, Aralıq dənizi ətrafındakı ölkələrə köç edirdi. Ölkəmizdə də əsasən köç vaxtı və ya Xəzər sahilində qışlayan fərdlər qeydə alınmışdır. Məsələn, 1988-ci ildə Yaşma adasında ovçuların vurduğu bir fərd tapılmışdır.
Görünüşcə digər əyridimdik cüllüt növlərinə bənzəsə də qısa və nazik dimdiyinə, qarnındakı xalların dairəvi formasına və qanadının ucundakı tünd çalma lələklərinə görə fərqlənir. Əsrimizdə növün 50-dən az fərdinin qaldığı düşünülürdü və təsdiqlənmiş ən son müşahidəsi 2001-ci ildə Macarıstan Respublikasında qeydə alınmışdır. Əksər ornitiloqlar və quş müşahidəçiləri növün artıq nəslinin tükəndiyi fikri ilə razılaşır. Növün nəslinin tükənməsindəki əsas amillər təbii arealının məhv edilməsi və ovçuluq olmuşdur.
Məlumat üçün onu da qeyd edim ki, ötən ay 7-si ölkəmizdə rast gəlinən 16 cüllüt növünün qlobal mühafizə statusu İUCN tərəfindən dəyişdirilərək daha sərt qorunma tədbirlərinə ehtiyac olduğu vurğulanmışdır. Ölkəmizdə qanunsuz ovçuluq bu kimi su-bataqlıq quşlarının nəslinin tükənməsində başlıca səbəblərindəndir.
Leave a Reply